Koméla, pou sharoye kann, bann plantèr i ansèrv traktèr. Dann tan lontan, zot té i ashète pti kamyon Reno dé-tonn-sink. Sa in kalité kamyon la dir lontan épi tazantan té pèrféksyone in pé. Sé konmsa k’in zour l’ariv lo dé-tonn-sink avèk in transformatèr Sinpar. Konm sa, lo kamiyon té i dovien in zanr kat-kat ; L’èr la pant té for, lèr l’avé la bou, lo shofèr té i mète lo Sinpar, konmsa té i tir myé épi té i transport in bon tonaz anplis. Kréol, par nésans, sé in kassèr le kui é li èm fabrik son patoi ; Sé konmsa k’in tan, pou dir fé in éfor, sansa fé la vîtes, té i di : « Mète Sinpar mon fra ! Mète Sinpar ! ».

Pou kossa mi anparl de sa ? Pou komansé, pars sa in vyé patoi é lé pa oblizé pèrd ali. Dézyèm rézon, pars zordi nout lékonomi lé an difikilté, é ni konpran bien si i fé pa in gro l’éfor, nou lé riskab kil an aryèr. Kil an aryèr, sa i vé dir nout rishès i sava an diminisyon, é konm nout popilasyon i rogoumant, nou l’apré apovri anou. Alé oir lé pli néssésèr ni goumant nout bann prodiksyon, mète plis demoun apré travay. Alé oir, koméla, sé lo kontrèr. Pli pir, konm di lo kont, kan lo mouvman lé bon, plito ké profite lo bon kouran, ni profite pa é ni ardésann la pant nou té fine komans monté.

Mi pans in pé va trouv ziska drol mi di sa lèrk la kriz l’apré souk anou épi bate anou atèr. In pé lé riskab majine moin na ziska in tour dan la tète pou kalkil in n’afèr konmsa zordi ; Poitan, avèk lo dévlopman dirab, ni antrovoi si tan tèlmann tik-tak pou ansort anou ké sré vréman domaz ni ariv pa tir nout kolé. In légzanp ? Nou na moiyin bate atèr la diktatir pétrol é gingn trap nout l’otonomi énèrjétik ; In n’ot légzanp ? L’oséan indien nana in kantité poisson é ni pèsh mèm pa in kantité konsékan ; In n’ot ankor, bann péi dan nout antournir l’apré dévlopé é ni pé profite l’élan zot i pé donn anou. Tourism ossi i pé bien lansé, sirtou si ni sava pa fé lo vèr la-ba Adélaïde... M’arète-la pars dann dé-troi lign, i gingn pa fé in liv, mé sak mi di, moin lé sir, sé la vérité, é toute demoun i oi in pé klèr sar dakor avèk moin.

Mé pou sa, i fo ni fé travay nout koko, i fo ni sava pli for, pli vite. Konm té i di lontan : « Pou nou ansort anou : mète Sinpar La Rényon ! ».

Justin