Oté

Pou nou souvnir l’asasina François Coupou

Justin / 31 mé 2019

JPEG - 43.6 ko

Mèrkrodi pasé, moin la gingn la shans partisip in sérémoni dsi sak bann roganizatèr l’apèl lo l’asasina François Coupou. François coupou in militan lo CRADS avèk doktèr Vergès épi militan kominis dann tan nou té ankor parti kominis fransé.
Néna soisant é in an sa la éspasé é sak la lès sali konm mord dsi lo blak la ru Zénéral de Gaulle, la pa in bann voiyou gran shomin, la p in bann nèrvis, mé sak demoun i apèl bann fors de l’ord : lété bann CRs lo préfé La Rényon l’avé donn dé z’ord.

L’ané 1957 la fé in zéléksyon frodé pou ranplas Dr Vergès konm mèr, l’ané 1958-lo 13 mé - la fé konm in kou d’fors militèr. L’ané 1959, moi d’mars, désèrtin nèrvis l’asasine Eliard Laude. Troi zévènman konmsa pou bien mark lo komans man bann zané de plon isi La Rényon : lo tan bann nèrvis, lo tan la korupsyon, lo tan la frod éléktoral, lo tan la réprésyon par bann fors la réprésyon.
Zot va dir moin pou kosa l’asasine François Coupou ? Pars li lété i danzéré bandi... pars li téi mète l’otorité fransèz dann danzé... Pars li té in révolisyonèr. Zot lé pa la ditou : in sinp épi in lonète travayèr, in pèr d’famiy konm l’avé in bonpé dann tan-la. In militan lo CRADS (comité rényoné pou l’aksyon démokratik épi sosyal), in sinp militan kominis. L’asé pou tyé in moun sa ? Dann tan-la oui.

Mésyé médam la sosyété, i fo pa ni obliy lo l’asasina François Coupou, i fo pa ni obliy lo 29 mé 1958, l’ané bann fors la réprésyon la tyé in militan kominis en plin dann shomin dsi lo blak la ru Zénéral de gaulle. Obliy pa sapars sa lamark lo komansman in bon koup de tan lété pa bon ditou pou nou La Rényon.