Alon sèye poz in définissyon : mi diré sé ariv a produir épi d’konsomé prinsipalman épi majoritèrman sak i pé trouv dan nout lanvironeman. Arzoute avèk sa si l’moune i fé sa la sékirité alimantèr sar pli fassilman assiré.

Astèr si mi rogarde dann mon téléfone mi trouv in définission konm sak i sui :lo koéfissyan lotosifizanss alimantèr sé in poursantaz ki pèrmète mézir la prodikssyon alimantèr d’in péi, par rapor sak son popilassion la bézoin konm nouritir.

Ni pé dir ankor trape son lotonomi alimantèr pou in péi é pou in pèp sé kan li produi sifizaman la nouritir pou satisfé son bézoin boir é manzé.

Mi pé di, koméla, dann noute péi la Rényon kissoi lotonomi alimantèr, kissoi lotosifizanss, kissoi ankor la souvérènté alimantèr, sa sé in bande zidé lé plizanpli popilèr. Biensir zot lé pa majoritèr dann noute lopinyon pou plizyèr rézon ni pé sèye oir in n’ot zour ... é konm dabitide, dann nout péi, lé possib i assist in lévé d’boukliyé in konba idéoloik lé pankor gagné.

Biensir sa i vé pa dir, si ni trape lotosifizans alimantèr sé pars ni sava manz maniok èk patate. Mé dabor ni pé di manioc, patate, kanbar, sonz é toute kalité ravaz i mérité nout réspé par rapor zot kalité gustativ-zot gouté si ni vé di sa konmsa-, épi par rapor sak zot i pé aporte dann lalimantassion nout pèp rényoné. Ob liye pa galamn noute zansète koman zot la nouri azot avèk sa.

Kossa mi antande dann mon zorèye ?Néna inn l’apré di sa lé pa bon ditou é anpliss sa lé pa varyé ?Lèv-la don. Alé sinploman dsu google épi zot va oir la kantité pla i pé fé avèk noute bande rassine, koman sa lé valab avèk la vyande pou sak i manj la vyande épi la shèr poisson pou sak i yèm sa, dozèf é toute kalité protide animal.

Fransh vérité mézami, si ni konsidèr bien noute bande nouritir lontan, si ni mépriz pa li, mé si ni rogarde sak li pé aporte pou nou, ni oi sa i pé rante dann ron noute lotosifizanss alimantèr é lé ga, bien konmlkifo.

A bon ékoutèr, salu !