La-ba dann Mayotte, la kriz sosyal la pankor fini. Bann marshandiz lé shèr, é gouvèrnman i trouv pa lo tik-tak pou diminyé bann pri. Pli pir, madam la ministrèz l’Outre-mèr la vni pou propoz bann Maoré la sharité. Mé banna la anvoy aèl baladé. Mèm in sindikalis Mayotte la domann la ministrèz pou aplik son bann solisyon dan la Frans, pars li la trouv sa konm in manyèr pou mépriz son bann konpatriyot. Bien antandi, la kriz épi la rézistans bann Maoré la kontinyé. Biensir, bann l’antropriz sak lé instalé la-ba la fine gingn in séryé kou d’boi dsi la lang.

Konm madam Penchard la pèr banna i vé, pou vréman, la dékolonizasyon zot téritoir, èl la trouv sinkant milyon l’éro pou, konm èl i di, rolans l’ékonomi, plito rolans bann profi. Pars gouvèrnman i aplik partou son mèm rosèt. Lakèl ? Donn krédi piblik, pou fé transform so bann krédi an profi privé. Donn krédi piblik pou fé marsh bann l’antropriz fransé. L’èr-la, l’arzan i bat in pti karé kourt dsi lo téritoir pou alé gonf lo pla bann l’antropriz la mèrtropol ou bien zot port-klé dan lo péi.

Kan i fé konmsa, l’ékonomi lo téritoir i dékol pa, é lo téritoir lé touzour anklavé dann kolonyalism fransé. I diré bann Maoré la fine konprann in n’afèr konmsa. Ala pou kosa bann sindikalis i kontinyé mobiliz lo moun pou fé bès lo pri marshandiz, pou mèt anlèr la départmantalizasyon san tardé, é galman pou in vré plan lo dévlopman l’ékonomi. L’èr-la banna i suiv gouvèrnman, i avèy ali konm lé dsi l’fé. Mi pans zot la fine konèt l’éspéryans rényonèz, é zot i vé pa, zot tour, èt pri dan la kol jak.

 Justin