Somenn dèrnyèr, moin la vi lo patron bann patron dann télé. Lo boug té apré ésplinn pars shomaz i goumante zour-an-zour. L’èr-la, li la lans in l’apèl konmsa, avèk larzan la Réjyon la prévi**, i rouvèr bann shantyé épi i donn travay demoun.
Bien bon ! Mé, par l’fète, kissa i lé so patron dé patron ? Li apèl Yann Leprince. Li la fé in prosé la Réjyon, dann tan Paul Vergès lété lo prézidan, pars, solon li, l’avé donn larzan in n’ote sosyété pou riyin, é li, li la pa gingn son par. Ni koné tribinal la anvoy ali dingué pars son ane té inn bourik. Arzoute èk sa, li la fé la kanpagn pou Didier Robert... pli gran démolissèr la poin. Alor, si li lé pa in zéro la gosh in shif, i fo li arète pran son bann dalon patron, é bann Rényoné an zénéral pou pli kouyon k’zot i lé. Pars la pa zordi li doi rann ali konte in sityasion konmsa. La pa zordi li koné Didier Robert la fé son kanpagn déssi la kass nout lékonomi é la kass sosyal.
Soi li té i koné byin sak té sava éspassé… l’èr-la, sé in n’afèr li la vouli. Alor, i fo li arète fé l’ipokrite. Soi li l’avé pa konpri, l’èr-la, i fo li shanj de nom, li l’a pa in prince, mé in valé i apèl Jocrisse, in pèrsonaz téate la tyé kouyon pou pran son plass. Pou évite la kriz, li fé vote pou lo démolissèr-an-shèf. Kan la plui i ménass, a li mèm Gribouille, li sote dann bassinn lo pou pa k’la plui i mouye ali.

Justin

**An plis lo tram-train, anplis la MCUR, la Réjyon avèk Paul Vergès l’avé prévi in sonm 300 milyon l’éro pou rouvèr shantyé in pé partou.