Sintandré, nana in lékol pou bann gran marmay- i apèl sa « lycée ». Nana poin tro lontan la fé sa. Lavé mèm pankor donn ali in nom...I vienn fé : l’apèl ali "Lycée Mahatma Gandhi ".Dizon, sa in bon nouvèl... Mi pans bann mètr la travay avèk lo bann marmay déssi Gandhi, akoz sa in moun té i vo la pène, par raport son vi épi son bann zidé ;

Mi éspèr ossi, zot la réfléshi ansanm déssi sak so lékol-la i amène an plis pou nou...Sa in tablisman HQE : i vé dir li tash moiyin ète bien dakor avèk lanvironeman. Sirtou, pa gaspiy la natir : la pli itonm, i zète pa lo d’plui..sa lé inportan ! Lékol i gingn fé son prop léstrésité avèk solèy. ; akoz dépans bon pé larzan, kan lé possib dépans moin ? Épi, lo bann sal, lo bann kouloir lé roganizé pou k’i fé pa tro fré dann livèr épi i fé pa tro sho dann lété.

Ziska zordi nou lé dann in filozofi « dépans plis, ashté plis, gaspiy plis », mé nou la fine konprann tan-la lé fini. Mèm si ni kontinié, ni fé konm Donald-Duck, ni asiz déssi in bransh, ni koup ali.. Konm sa ni bate nout déyèr a tèr kan lo bransh i kalbite dann vid.