É vou-zot ? Zot i ansouvien ankor zistoir la métrès té i rakonte ? Dann zistoir-la, lavé in bote mazik..Sa té i pèrmète fé gran-gran pa, épi fé bann gran-gran parkour k’em ou lé pti, k’èm ou lé shéti, k’em la pa tro forsi.. In pa mem, ou i fé sète lié, donkalor vint-uit kilomète..Pou sa i sifi k’ou i mète out bote mazik !
Zot i trouv pa, konm moin, ké listoir la fine mète déssi son pié son bote sète lié ? Li la fine mète son tirbo ? I diré li fish an vitèss, vèy pa koman. Sa lé vré pou vréman ! I sifi agard, pou pran konéssans sak demoun l’apré fé pou batay kont dioksid karbone, sak i apèl galman le gaz a éfé d’sèr....
Ni oi demoune l’apré lité pou anpèsh klima tro shofé, épi le tik-tak i marsh bien !
Dann in pé tout péi, i plant pié d’boi pou anpèsh dioksid karbone fane partou son mové léfé déssi klima la tèr. Demoun i plant piédboi, gran plantasion konm ti plantasion,,zot tash moiyin prézèrv la natir. Bann gran péi, konm Kanada, Japon, d’ot ankor i fé sa !.
Dann gran péi solman ? A, non, Baya ! Issi La Rénion, nou lé pa an rotar déssi késtionn sa : I sava plant zalantour la rout tamarins, sink san sinkante mil pié d’boi pou ardone favèr nout biodivèrsité, pou armèt anlèr nout vézétasion sak lavé dann tan lontan, épi bien sir pou sèy défann klima tro réshofé.
Lé vré, fé in n’afèr konmsa tousèl, ni gingn ar pa, mé si tout i done la min..Si konm i di, i plant in miliar d’pié d’boi, mi pans lé shoz va aranzé é nou rénioné, nou sar fièr an avoir done in bon légzanp, pou zordi konm pou demin, pou tout demoun i viv déssi la tèr, é i vé pa limanité i fini an kit-ta-bouète/.