Déssi la késtyonn la mizèr dan la Frans, l’INSEE i sort fé konète bann shif. Nana plis uit milyon demoun lé dann la povreté. Sa i fé in pèrsone déssi sète, sansa plis treiz pour san d’moun. Sé dir si lo prézidan l’avé promète élimine la mizèr la gingn trap son bi. Ankor, mi sort antann sokour popilèr i roprosh sa bann shif l’ané 2009. Pars pou li, k’i rosoi in kantité d’moun, lo shif la povreté la agrav ankor l’ané 2010 épi 2011. Toute demoun lé dakor pou di sa in sityasion lé pa tolérab ! Mèm dann télé La Rényon épi dann bann zournal i di sa.

Mé sa i fé pans amoin o-moins dé z’afèr. Dabor inn, kan Paul Vergès, avèk la Réjyon, la fé in plan pou kal la kriz, bann médya la fé tout sak i fo pou fé pèrd l’Alians zéléksion, épi zot la bate la min pou tout projé Didier Robert épi l’UMP. Zordi, lo rézilta lé sak li lé, é na poin pèrsone pou fé son méa-koulpa. Myé k’sa, i déranj pa zot ankès larzan la kominikasyon La Réjyon ! Aprésa, zot i anlav lé min pars la pa zot l’otèr si nana zordi plis san karant sète mil shomèr, é plis sinkant pour san d’moun mizèr.

Lo dézyèm z’afèr, zot i parl lo trèz pour san bann pov nana dan la Frans é l’idé i vien pa zot anparl lo sinkant pour san pov nana La Rényon... Moin, pèrsonèl, moin té i pans in bann zournalis diplomé, indéksé, donèr d’loson l’avé, dann zot tète, sansa dann zot dosyé in bann poinn ropère. Kansréti pou di na plis troi foi plis pov La Rényon ké dann la Frans, mé pétète sa la pa in n’afèr pou dir ? Kansréti pou dir, issi osi la mizèr la goumanté, mé pétète sa osi i fo pa dir. Pars, sirtou, i fo pa malkontant sak i gouvèrn anou.

Justin