Si ni kont byin, i rèt apopré trwa sominn ziska mwa désanm pou zéléksyon, trwa sominn pou byin argardé, pou byin kalkilé, sirtou pou pa fé la kouyonad lo sis désanm. Si ni fé la kouyonad lo sis, aprésa na rogrèt nout fars é va rèt a nou zis pou manz la raz konm an 2010. Sirtou, antansyon bann kandida i fé lo ronflèr, sak néna in chaplé promèss, boudikont aprésa i dovyin sèk, aprésa i fil an zourit. Pou kosa mi di sa ?

Banna i di gran prométèr, sovan-dé-fwa i dovyin p’ti donèr. Ala, toudinkout in lis konkirant konm i di, i promèt a nou aryink 30000 anplwa, poukoué pa 20000, poukoué pa 40000 é plis minm ? Poitan lo madam i aminn la lis, sak la promèt sa, la pa promié fwa li présant a li zéléksyon, li koné koué i vé dir rotourman manivèl apré. Ousa i sar trouv larzan pou fé sa ?

An 2010 misié Didié la promèt a nou 2000 bis, Poitan nou la di, koman fé déboul 2000 kar dann shomin èk lanboutèyaz lavé déza ? Nou lavé di tousala té mantèr, vik transpor lo kar té zéré par konsèy zénéral, konsèy zénéral i okip déza kar zonn. Nou lavé minm di, misié Didié sé lo rwa lanboutèyaz, vik d’si son kominn minm li la kal la rokad. Boudikont zordi tout i vé lo tram-trin. Mézami, pou pa manz la raz domin, anon vot pou “In Rényon nouvèl“