L’aktialité, mé z’ami, ma dir azot, sa in n’afèr lé bon suiv. Pou kosa ? Pars i fé konèt aou dé shoz ou té i oi mèm pa an rèv. Pou kosa mi di sa ? Pars bann zournal, sansa bann télé, sansa ankor bann radio i shoizi pou ou sak nana pou amontré épi sak i fo pa anparlé. In l’égzanp : Lo Mali ! Zot i koné, sa in péi lé indépandan dopi 1960 par la. Avan, té in koloni la Frans, é avan sa ankor, té in gran l’anpir in prins l’Afrik la fondé... Moin lé sir, in bonpé d’moun i kroi La Rénion i égzis avan lo Mali. Poitan, nout l’istoir na arienk 350 z’ané, é si i vé rakont l’istoir lo Mali, i fo ni romont ziska l’ané son fondasion, 1240. San konté bann roiyom té la avan ankor.

Solman, moin lé sir, in bonpé kolonio i kalkil, avan la Frans la kapar lo péi, navé poin d’moun la-ba, l’avé poin in vi ékonomik, l’avé poin in vi politik épi in vi kulturèl. Poitan l’avé ! Lé vré, zordi ankor, na in pé i pans La Rénion i égzis dopi zot la poz lo pié Zilo ou sinonsa dsi l’ké lo Por. Sa i fé ri anou, sansa nout ti pé d’san i bouy. Alon arvir dsi lo Mali : In l’égzanp, dann nor lo péi, na in vil i apèl Tombouctou. Sa té in kapital politik, rolijié, kiltirèl, ékonomik. M’a dir azot in n’afèr, bann z’étidian l’Erop té i sot la mèr pou alé fé z’étid Tombouctou. Mi pé di ankor, dann tan-la bann z’étranjé té lo bienvéni dann vil-la, é té i done azot bann méyèr plas pou zot étidié san dépansé. Sé dir si banna té i koné viv, par rapor l’Erop té ankor kaziman dan la sovajri.

Pou kosa mi di sa ? Pars ni sort konèt, bann rebèl la fé la-ba krime kont la sivilizasion, krime kont lo patrimoine, krime kont la kultur. I paré bann éspésialis intèrnasional l’apré travay pou arkonstrui lo patrimoine, konm mozolé bann sin, konm bann bibliotèk, bann mizé é in ta z’afèr. Sa i vé dir, inn, nana in patrimoine inportan la-ba, é nout l’istoir d’Frans la sèy fé pas banna pou sovaz ziska dèrnié dégré. Dé, sa i vé dir osi, si bann kolonio l’avé pa maltrèt bann péi-la, zordi zot noré té pli avansé. Troi, sa i vé dir, si la trèt bann noir l’avé pa vid lo péi, é bin zordi noré pa été konm sa.

I fo dir osi, si l’ané 1960 l’avé dékoloniz lo péi konm ki fo, zordi son ka nar pa été konm sa. Mé konm moin té i di an débitan, pou konèt lé shoz, i fo suiv l’aktialité, fo aprann l’istoir. Konm sa i fé pa pran aou vési pou lantèrn.
 
NB : In tan té i pran in vési pork, té i fé sésé épi té i mèt in bouji dodan konm sa té i ansèrv konm limièr, mé pa in vré limièr. Donk, konfonn lo vré èk lo fo.

 Justin