Matante Zélida la ékrir Justin :

Mon shèr nové, mon spès salté,
D’apré sak mi oi, zot, bann rouj-de-fon, zot i ronons pa z’ot bann gran projé… konm i di, « bann projé faraonik ». Zot té pa kapab kontante azot bann projé sak lé itil, sak lé néssésèr, san alé rode lo liks ? In lékol, la pa bézoin fé ali an dantèl pou k’bann zanfan i aprann byin… in route, i sifi k’loto i gingn roul déssi, in batiman, i sifi ké li zoué son rol konm k’i fo. A non ! Sa la pa asse ! I fo zoué dan lo gran, i fo zoué dann la boté initil. Zot i konpran pa lo moun i vé pa d’sa ! Kontinyé, apré kriy l’inzistis kan v’arash z’ot kro. Tok, pran sa pou toi !

Justin la fé pou répons :

Si mi konpran aou byin, i fo toute z’afèr lé byin ordinèr ! Moin pèrsonèl, moin lé pa dakor avèk ou. In légliz, sansa in shapèl tamoul, sinonsa in moské, in pagode, mi préfèr sa lé zoli, byin bati, byin solide, byin proporsyoné. In lékol galman, in route ossi, in park parèyman. Kan ou lé dann in batiman, mi trouv i fo ou lé dann in landroi ou i san ou lé byin, na bon konfor, épi ou i koné promyé siklone i foute ar pa li atèr, la ravine i kass ar pa li, épi ou na lo santiman li lé la pou lontan. Pou kossa mi pans sa ? Pars pou moin, lo dévlopman dirab lé pa inn krak, sé in n’afèr k’i doi ète byin réèl. Mi pans toute sak demoun i fé i doi an avoir in l’intéré ékonomik, in l’intéré sosyal, kiltirel, é li doi pa zir avèk l’anvironman. Arzoute èk sa, si lé byin gayar, byin zoli, byin doss, i gate pa aryin. Pou sa mèm lo dévlopman sar in dévlopman dirab !

 Justin