Konm mwin la di tro d’rézon égal pa d’rézon.. Ziska ké toudinkou i fuite Israel épi son sèrviss sogré la inform zétazini in gran rényon toute bann résponsab politiko-rolijyé L’Iran é konm zot téi vé défrish banna dopi in — dé zan té lokazion atandi. Pars pou zétazini konm pou Israel téi sifi koup la tète pou étinn lo réjime… So matin i anonss in layatola la ranplass sète banna la tyé. Israel la di li va tyé lo nouvo é Trump la di sé in n’afèr i mète ali an kolèr pars lo réjime politiko — rolijyé i torpiye pa li toussèl.

Astèr inn parti lo pèp l’iran lé kontan mé li rann ali konte par li mèm sa la pa la solission démokrat li téi vé épi li domann ali si zot i doizète kontan oir zot péi ékrazé. Mé sak i éspass dann lafganistan i doi fèr rofléshir azot. Pars la instal in réjime anti-taliban, la done lo droi bann fiye alé lékol épi travaye, é toudinkou l’Amérik la romète lo pouvoir dan la min bann taliban avèk lo rézilta ni koné zordi : bann fiye avèk bann fam na pi lo droi ni travaye ni alé lékol, parl-pi lo voil é toute sak i s’ansui.

Finalman, konm mwin la di, tro d’rézon égal pa d’rézon é sak i kroi israel épi zétazini i sava mète la démokrassi an plass épi réstor bann libèrté ébin zot i fé in l’érèr é final de kont sé la nassion épi lo pèp va artonm ankor in kou konm viktime. Kan lo mal lé dé koté li lé pa d’in sèl.

A bon antandèr salu !

Justin