Li fash avèk inn, li fash avèk l’ote, li ménass, li bonbarde, boudikont li kroi sé li k’i komann lo mond mé si son péi lé for, li lé for pou vréman mé sé a d’mandé si li fé in bon zizaz son forss, é final de kont lé a dmandé si li lé pa plito okipé pou détrui son péi plito k’fé avanssé.

Talèr-la mwin té apré ékout in léspéssyalist l’ékonomi apré dir kan li blok lo fuel lour lo Vénézyéla, finalman li fé d’tor son prop lékonomi é aprésa kan li propoz bann grann sossyété pou rante dann trin lo Vénézuéla épi pou romète bann zinstalassion bien an form, banna lé pa anshanté ditou pars zot i oi pa oussa i lé la stabilité ladan.

Dsu la késtyonn pétrol, zétazini néna bonpé pétrol lézé pou fé l’éssans, mé i manke ali pétrol lour pou fé gazual é sa li pé trouv Vénézuéla, sansa Kanada, mé li fé ansorte banna talèr i manz pi in grinn sèl avèk li é konm li baz dsi la fors tardra viendra in pé va drèss avèk li é lo gagnan lé pankor marké dann liv listoir. Daid la pa tyé golliath in zour ?

Pandann tan-la lé vré bann pèp i soufèr : lé vré i anlèv in Prézidan san rézon, lé vré i anpèsh cuba viv konm k’i fo, lé vré livé karssèr Groenland pars li di li la bézoin gran péi-la mé sa lé Danemark, alor ? Alor li fini par monte bonpé demoune kont li é li mank pa konm mwin la mark an-ola, koup la bransh li assiz dossi.
A bon antandèr salu, in sityassion abien suiv antouléka.

Justin