Sé konmsa k’in matin mwin la angaj la diskission avèk in moune mi koné pâ tro oziss é konm par azar li téi sorte Sint-Sizane é léstati Edmond Albius lé pa tro loin son kaz. Nou té apré diskite in pé dsi la fékondassion artifisyèl la vaniye é li la di amwin nète konmsa : « wi kroi sé Edmond Albius la dékouv sa ? Tan k’mi oi pa, mi kroi pa ! »... Mwin téi vé réponn ali, sa i vé dir wi kroi pa bonpé zafèr é an parlan d’Albius, landroi li lé, li sorte ar pa pou dir aou la vérité.

I diré sa la mète balon dann son kan é li la anshèv dir amoin, li kroi pa sak li oi pa ; final de konte li la di amwin toussala sé zistoir. Dizon zot i fé konm zot i vé.biensir i sava pa fé ali la démonstrassion Edmond Albius la vréman égzisté, ké d’apré son l’anssien mète sé li ké la trouv lo tékbnik pou gonde la vaniye... Mwin la préfèr ékoute noute dalon Daniel Honoré lo moune la di sak mwin la marke an-o la.

Mé mi mète amwin la plass bann zanfan i antan zot paran dir dé shoz konmsa, mi panss sa i pé arienk détrui zot anvi pou shèrché, é pou trouvé, sirtou si l’amour zot paran i fé mète azot in bon plass dann zot léstime. L’èr-la, mi panss, sèryèzman, bann zanfan konmsa lé riskab zot i pèrss pa dsi lo fron la syanss, listoir, la dékouvèrte lo monn, la dékouvèrte la natir. Pov proféssèr okipé pou dir marmaye-la la tèr i tourn dsi èl mèm, osinosa lo shan bann zétoil lé infini, sansa ankor néna in trou dan la koush l’ozone.

Lédikassion bann marmaye sé in n’afèr konpliké éli domann l’assossyasion in bonpé zaktèr. Si toute i sava dann sanss la konéssans, mi panss lé bon, mé si na inn, lo pli émé, lo pli admiré i pran lof o pou lo vré, lé possib pou démar dan la konèssanss lo marmaye lé in pé an difikilté é si konm mwin la ékrir an-o la, listoir sé zistoir ébin oila ké li lé bien anbété. Pars, ni vé, ni vé pa, mé listoir la pa arienk zistoir, sé bonpé pliss ké sa.

A bon antandèr, salu !

Justin