Nana in l’éksprésyon-in kozman pou la rout si zot i vé-mi yèm ali tré bien. Sé « manz patate avèk la po ! ». Pou kosa mi yèm ali tré bien ? Pars étan pti, mon papa té i fé kui manzé koshon dann in gran marmite an fèr-pétète sa té i ansèrv pou kui manzé pou z’animo, pétète ankor mé moin la pa sir téi fé kui manzé pou bann zésklav sansa z’angazé, mé mi di moin lé pa sir ! An touléka, dann gran marmite la moin é pi mon bann frèr té i trouv do koi kontante nout bouzaron.

La-dan l’avé patate konm moin la di ! L’avé manyok ! l’avé lo son, mayi, é mi pé dir azot nou téi trouv nout bonèr la-dan.solman, lé vré, manz dé shoz konmsa, la pa in mark dignité, lélégans, épi savoir viv, épi ankor san obliyé losavoir fèr. Savoir fèr, dann la vi tou lé zour, savoir fèr dann tout sort biznès, épi ankor dann la vi piblik. Si tèlman k’in manzèr d’patate avèk la po, la pa in moun pou amenn lé shoz konm i fo.

Aminn lé shoz konm i fo, sé kan ou i abiz pa larzan piblik, ou i lèss pa koronpiye aou, ou i fé réspèk out dignité. Out konsyans lé pa a vann, lé pa a ashté non pli-sa sé in gran léson nout parti kominis la amontr anou dopi lontan, é sa sé in léson ni doi pa obliyé… Nou la konète la frod zéléksyon é sa té i zoué kont nou ! Nou la konète lo défo d’solidarité dann la sosyété é sa té i zoué kont nou, nou la konète demoun i tourn anou lo do pars zot i rode z’ot z’avantaz pèrsonèl, nou la konète galman la réprésyon.

Mé na poin pèrsone i pé dir nou la manz patate avèk la po, pèrsone i pé dir nou la vann nout l’am, nout kèr, nout konviksyon é nou lé asé fyèr avèk sa. Tanka sak la pa fé konm nou, sak la manj patate avèk la po, de mon poinn vizé, mi pran azot pou sak zot i lé réèlman, é mi souète azot in bon dizèstyon… Ziska k’in zour, pétète, zot va sèye anval in kékshoz tro gro pou zot, kansréti in bèl koulèv - l’èrla, sar lo zour d’vérité.