Nana in pé kan in match lé fini, mèm si zot la pa zoué, si lékip zot i profèr la gingné, zot i di : nou la fé si, ou bien nou la fé sa, nou la fé pèt la kol ! Romark, ni pé éskiz azot, vik si zot lékip la pèrd, zot i di galman : « Nou la pèrd ! ».
Na dé foi, la pa arienk pou in lékip zot i koz, zot i koz ossi pou in péi : mi souvien kan la Frans la gingn la koup di mond foutbal, in pé té i koz konmsa... Moin pèrsonèl, mi kritik pa zot : boudikont, lé tro fasil kritik lé z’ot épi rèst a part. Konm bann shinoi, i di : rèst déssi la montagn pou agard bann tigr batay dan la plène.
Mé dann fon nout kèr, ni koné bien ni pran parti pou inn sansa pou l’ot. Di pa moin, dimansh, kan lékip de Frans la zoué handbal, zot té i kass pa la tèt, zot téi di : « sak i gingn, i gingn, épi sak i pèrd, i pèrd ». Di pa moin zot la mazine zot i s’anfou pa mal lo rézilta, akoz la pa sa va fé gonf z’ot pla.
Moin lé pliské sir, konm moin-mèm té i énèrv azot kan lo ladvèrsèr té i larg pa lo kor vitman. Moin lé assiré, z’ot gaz té i mont kan larbit té i sif in fot kont lékip la Frans, mèm si la fé fote pou vréman. Té i rann azot bandé an tann-sis kan lantrénèr téi fé rèst Narcisse déssi lo ban olèrk fé rant ali... O fon, nou lé parèy ! Dan nout fonnkèr, ni bate la min kan La Rénion i gingn, kant in rénioné i amont son gou d’sel. Dimansh, nou té i bat la min, dann nout fonnkèr, kan Narcisse té i fé oir son kapasité !
Final de kont, pou kissa nou va pran parti ? Pou in bann moun ni koné mèm pa ? I rèss dann in péi lo nom i korsh nout boush si tèlman lé dir pou di ? Lé vré, nout tout lé frèr déssi la tèr. Sa lé bien vré ! Mé sa i anpèsh pa nout kèr fonn pou sak i mète nout péi anlèr, pou sak i mète la Rénion anlèr.

Justin