Méssyé, Médame, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami, toute zouèr fotbal épi toute bande léspéktatèr, i koné kozman-la. Sa i vé dir konmsa lo match lé pa gagné d’avans, é lo favori demoune i done la pa sir li sorte an promyé. A biensir bande zoinalis sportif i koné par avanss kissa ki sava gagné, sof pars néna touzour in sof, touzour in risk lé shoze i éspass pa konm bande gran pronéstikèr i di.

Mé si ni mète par koté lo zistoir d’balon k’lé ron, la vi néna in bonpé sirkonstanss ki fé ké sak i doi arivé i ariv pa forséman é sa sé pou dir shakinn néna son shanss dan la vi provi ké li mète toute lé shanss son koté.

Lyèv avèk torti i fé lékours. Kissa i doi gingn la kours ? Lyèv biensir ! Mé dann noute zistoir la pa lyèv k’i gagn, sé la tortu é sa sé in lankourazman pou lo pli pti, lo pli fèb, lo pli pov, los an grade, mé lo pli malin. Alor, mézami dann toute parti, dann toute konkour, i fo ni prépar anou konmsi ni sava gagné é tazantan ni pé gagné. Néna arienk lo konkour wi amène pa a-fon ké ou lé sir pèrde.

Alor, mi invite azot rofléshi dsi kozman-la é ni artrouv pli d’van. Sipétadyé.