Dann modékri zournal lindi, moin la anparl in soiré dan komine Sint-André, in lasosyasion foutbal inter-kartyé la roganizé, é bien roganizé. Moin la anparl osi in roprézantasion in group maloya. In bon soiré, konm moin la di. Mé kan moin la parti, lo soiré té pankor fini, mé konm di lo kont, kan marshan la sab i pass, i fo alé pars mèm èk in boi zalimète, lo zyé i rèss pa ouvèr. Donk lèr k’lariv mon lèr, moin la baré.
Landomin, mi trouv in dalon i di amoin, akoz moin la parti bonèr ? Mi réponn ali, moin té apré gingn tatane-tatane, sa i vé dir somèy. L’èr la li di amoin, moin la mank lo méyèr. Lo méyèr ? Li di amoin, léspri la mont dési troi madam. Léspri ? Moin lé pa né yèr, donk mi koné kosa k’i lé. In pé i apèl sa tranz. L’èr-la li rakont amoin koman lé shoz la spasé ;
Apré lo group maloya té fine done son éspéktak, la mizik lo salon bal la ropran son rol. Korèk, vi k’lété prévi konmsa ! Mé l’èr zot la pass in maloya, gramoun Lélé, ou sinonsa in n’ot zansien, mon dalon i ansouvien pi ozis, l’afèr l’arivé. Troi madam, léspri la mont dési, la mète a dansé konm in dans malgash épi la tonm atèr. Domoun la soutien azot, pou anpèsh tonm tro for atèr. Talèr nora été riskab kass in boute dési zot ! Fors-a-fors, avèk lo tan, zot la ropran favèr, zot la lévé, lo zyé in pé dan lo vir-vir é zot famiy la antour azot ; astèr-la, in pé toulmoun, shakinn la trouv son lésplikasyon ; shakinn la di, in n’afèr konmsa lété prévi. Zot i koné, na d’moun lé pli méyèr k’lé zot, lé pli savan ké lé z’ot. Fyé dsi, mé kont pa tro.
Pou mon par, demoun an tranz, kisoi dovan la shapèl indyène, kisoi dann sèrvis kabaré, kisoi dan désèrtin sérémoni katolik, moin lé fine vi, é pa arien k’inn. Moin la fine poz amoin késtyon par dsi késtyon san trouv in lésplikasyon, mèm san pans moin va trouv in zour in lésplikasyon. Mi di dann mon kèr, si i tienbo kont nout mélanj nasyon, sirman sa i doizète in klé pou ésplik l’am rényonèz. Boudikont, mi pans pa si in moun lé kapab trouv lo klé. Pou fé lo déskripsyon, i pé fé lo déskripsyon, pou trouv lésplikasyon, sa sé in n’ot afèr !

Justin