Lo réshofman klimatik, sa la pa in gro mo, nout tout i koné sé koué ? Sa la pa in nafèr konm sa domoun la invanté pou fé bat la lang dosi, la pa nonpli sanm pou mwin solman in tiktak pou fé vann papié zournal. Lo réshofman klimatik zordi i dwa konsèrn nout tout, nou na lo dovwar argard lo dogré d’santé nout planèt. Alorss, kisa lé konsérné, koman, ousa ? Shakinn, son manièr, partou. Néna i fé konm lotrush, i mèt la tèt dan la sab pou pa war, pou pa antann, pou pa an kozé. Mé orozman néna osi i sobat zour an zour pou sa.

Dimansh proshin, lo 7 zwin in koléktif “touch pa nout roche bwa blan“ i organiz in marsh zistoman pou sèy sov nout planèt. Mi di sa konm sa, vik lo mobilizasyon prévi sé pou manifésté kont la karyèr bwa blan. La, bwa blan i sava estré lo rosh, galé tousala, pou fé la nouvèl rout di litoral. Lé résponsab lo koléktif i di, si i fé konm sa nora déga sanitèr, nora déga si lanvironman, si la natir, si la flor, si la fonn, si la mèr tousala, parl pi kalvèr domoun otour. Tousala pou fé in rout si la mèr ki fé bokou kozé.

Ala zordi ankor néna i domann poukoué i fé sa ? Ala ké zournal déor i an koz de plizanpli .“La rout la pli shér de frans“ dapré désértin. “Lo prozé fou ki sar ruin la rényon“ pou dot. La ankor bann zournalis i pwint lo bann déga si lanviranman. Konbyin larzan i sar kouté o final de kont ? Poukoué so gran prozé initil ? Si i toush lanvironman, néna touzour in léfé si lo réshofman. Minm banna lé apopré dakor pou apèl lo rasanbloman la d’si. Donkalon dimansh ni artrouv a nou bwa blan pou la shèn iminn, pou tyinbo la min lin a lot.