Néna lontan moin lé dsu la tèr, sa lé bien vré ! Mé mi pans moin la pa shanj in bonpé, késtyonn lopignon, késtyonn rézoneman. La prèv :
Kan moin lété pti, moin té i yèm pa shoushou é kan momon téi domann amoin pou koi. Moin té i réponn : poukoi oui ! épizapré kan èl téi domann si moin néna in n’afèr pou razouté la dsi, moin té i réponn : non. L’èrla èl téi di amoin : poukoi non ! Mé moin téi di pa arien pars moin l’avé bien di moin l’avé poin arien pou arzout èk sa.

Apré moin la grandi é moin la pa yèm lékol pou vréman. Poukoi ? Poukoi oui ! épizapré kan téi domann amoin si moin l’avé poin kékshoz pou mète avèk sa, moin té i réponn : non. L’èrla, si i domann amoin : Pou koi non ? Moin téi di pi arien pars moin l’avé bien di moin l’avé poin arien pou arzout èk sa.
Avèk laz, in zour téi falé travaye é moin la rann amoin kont moin téi yèm pa travaye é kan téi di amoin pou koi ? Moin téi réponn : poukoi oui ! aprésa si téi domann amoin si néna in n’afèr pou razout èk sa, moin téi réponn : non. Lo moun té i domann amoin : poukoi non ? Mé moin téi di pi arien pars moin l’avé bien di moin l’avé poin arien pou arzout èk sa !

La sézon travaye fini pasé, la sézon rotrète l’arivé. Moin la pa yèm la rotrète é demoun la domann amoin pou koi ? Moin la réponn : poukoi oui ! Konm in pé téi vé mi arzout kékshoz la dsi, moin la di non. L’èrla la domann amoin si moin l’avé poin kékshoz pou mète la dsi, moin la pa réponn arien pars moin l’avé di moin l’avé poin arien pou arzout èk sa !
L’èr la mor l’arivé, moin la pa yèm la mor. Mon lanz gardien la domann amoin poukoi ? moin la réponn : poukoi oui ! Kan li la domann amoin si l’avé poin in n’afèr pou arzout èk sa, moin la réponn ali : non. Li la dmann amoin : poukoi ? é moin la réponn : poukoi non ! Pars moin l’avé poin arien pou arzout èk sa, konm moin la di.

Pou koi oui ! Poukoi non ! La plipar d’tan mi koz konmsa pars mi pans la pa bézoin in gran dévlopman pou in sinp zafèr konmsa. Mi pouré avoir la diaré vèrbal é koz tanpir k’lé posib mé konm moin la di, la plipar d’tan mi pans la pa itil ni nésésèr lans amoin dann in gran lésplikasyon sirtou in zour d’mavouzité konm zordi. Eya Bondyé ! Alé ! ni rotrouv, pli d’van, sipétadyé !