Zéléksyon la finn pasé dopi dé zour, boudikont an moun résponsab, kosa ni dwa rotonir konm loson toudsuit ? mandoné, néna touzour in loson pou sak i vé konprann. Tir loson sirtou pou pa arkomans minm lérèr domin. Déza, sak lé plito sir, sék domoun la pa bouskil lin a lot dovan biro d’vot, domoun té plito klèr-klèr, 50 pour san participasyon i prétan. Final de kont, kisa la gagné ? Kisa la pérd ?

A lèr ki lé, sanm pou mwin mi krwa, nout divizyion a gosh la fé gingn la drwat. Zot va di, sak lé fé-lé fé mé pli souvan kan lé ini pou d’bon, ni koné lé pa sir gagné, mé kan lé divizé ni koné lé sir pèrd. Lé vré pou vréman i fé pa la politik èk la si. Si lavé in linion rant-rant dopi lontan ? Si in ot moun té i kondui la liss ? Si inn dé té pa séktèr, si lavé in program ansanm ? si lavé in bon prozé pou la rout, pétèt nora été otroman.

Dikou, inn ti pé d’moun la parti voté pou vréman, isi konm laba déor. An plis, inn dé i di osi konmsa domoun i vé pi voté par rapor la politik lo gouvernman i aminn. Dopi 2012 na pwin aryin, rézilta, oki bourik pou travayèr. Terla la anons in bon nouvèl, tanto néna in goumantasyon lo smig de 0,6 pour san. Aprésa étonn a nou ké domoun i sar pi voté ou sinonsa i vot an kasinki