Kosa lo présidan la di mandoné si la répiblik ? Kan li la di konm sa, a mwin présidan… a mwin présidan… zot i an souvyin pi ? Pétèt lé lwin, sépousa ni koné pi. A mwin in kozman la rotoni mon latansyion kan li la di konm sa : a mwin présidan mi vé in « répiblik iréprosab ». Sanm pou mwin li la koz tro vit, minm èk li lo répiblik néna boubou. Bann vié i di touzour avan kozé « tourn out lang bon pé fwa dann out bous » sa lé valab pou nou mé lé valab osi pou lé zot. Zot la sirman antandi parlé, d’in madam déor ki soré sispékté d’in détournman larzan ?

Mi di byin èl i soré sispékté, mi répèt sak zournal i di, sominn dérnié zournal té i parl ryink dé sa. Lo madam té i travay pou in gran ladministrasyion, i prétan pou in oui pou in non èl té i apèl taksi, néna pou o mwin 40000 éro taksi pou 6 mwa, i fé bokou. Son zanfan osi la tiliz lo taksi pou son bozwin pèrsonèl, la néna pou 7000 éro. Tout ansanm néna pou zoué. Tousala lé koni zordi, lo madam an késtyon té oblizé démisyoné é i prétan èl i sar rann lo larzan. Lé normal vik lo présidan i vé inn répiblik iréprosab.

Zot va di a mwin, si lo madam la foté, li dwa pèyé, lé normal i domann a li dé kont. Mé orozman tanzaot la répiblik néna gran kèr èk désertin, la répiblik i abandonn pa son zanfan, son syinn, la répiblik néna rokonésans èk in pé. Konm pinisyion lo madam la artrouv travay dann in ot ladministrasyion. Pa ninport dé ki la artrouv travay pou li, in minis. Mi domann a mwin si lété pou in volèr poul, si lété pou in volèr lapin kisa noré rod travay ? Si la répiblik lé pa malad, si li na pwin boubou, dizon li na la fièv. Sinon poukoué i fé tousala an misouk !