Si ni vé argard in pé do pré tout lo tourné viré la politik zordi, si ni pran byin lo tan konprann konman éspass lo nafèr la politik, i spé mandoné néna i pèrd lo fil vik tout lé fé pou anbrouy léspri shakinn, pou mié fé anval a nou koulèv. Zordi i di a ou lé blan, domin san zésplikasyon i pé di a ou la finn ni nwar, landomin ankor i pé roshanzé é lé konm sa tout l’tan, boudikont sé listwar kart nwar kart blan, ni pèrd touzour vik lo zé lé triké davanss. Poukoué mi di sa ?

Mi sort ékout in pé lo déba si lé zactivité la rézyon rényon, Koman la koléktivité i fonksyonn èk son bidzé ? Dsi la rantré larzan, dsi lo dépans, koman la dépans lo larzan, koué la fé ansanm ousa i sort lo larzan, tousala ? Byin sir i sazi gro larzan. Dapré sak i di, néna noré ansèrv a zot konm i fo èk in salèr 8000 éro i prétan. Inn i akiz lot dawar toush in gro pékil pou son radio. Zot la konpri la parl aryink larzan é gro larzan tou lo tan. Boudikont la pa di tout, mé sanm pou mwin larzan i mank pa.

Dawar lé normal pou in koléktivité konm la rézyon rényon an parl larzan konm sa, mé minm moman mi antan linnsé dan son dérnié létid i di konmsa 162 000 rényoné i viv dann in kartié priotitèr sétadir dann in kartié pov. Linnsé i dénonm 49 kartié pov. La plipar d’moun i viv anndan la i viv èk mwin 660 éros par mwa. Solman in mwa larzan pou ryink in kaskèt pou lo présidan pou in mwa i roprézant in an rovni pou in moun i rèt dann in kartié prioritèr. Alé konprann poukoué mandoné in bann i di “mwin lé pi la èk sa“