In zour, lo prézidan Kroutchev, la larg dann figir bann z’amérikin. Li la dékla banna dann son péi poul i kakaye mé i ponn galman, alé oir dann l’Amérik poul i kakaye mé i ponn pa. Zot va dir amoin té pa in kozman tro diplomatik mé dann tan-la lété konmsa. Moin, pèrsonèl, moin la romarké inn-dé poul i kakaye épi i ponn, mé nana inn-dé i kakaye in bonpé mé lé rar i ponn. Astèr kosa nout kozman zordi i vé dir : i vé dir sinploman, nana dmoun i di zot i sa fèr, zot i sa tyé douz pou blès katorz mé zot i fé pa. Moin mi pans I vo myé in moun i anons li sava fé kékshoz, pétète pa bokou, mé li fé pars sak i di li sar fé in bonpé z’afèr, i ariv ké li fé pa arien. Alé ! Mi éstop tèr-la é ni rotrouv pli d’van.