Médam zé Mésyé, la sosyété, koz èk moin sé koz èk in kouyon mé sé o d’lo mir k’i oi lo vré mason. Zot i koné moin la touzour antann dir bann zanimo i vèye dsi zot ti ziska lo pti i gingn débrouye ali tousèl. Mi souvien étan pti nou l’avé in shate téi apèl minouche ébin kan li la gingn ti, i falé oir koman li té i avèye sa, dopi lo tan lo zyé té boushé ziska lo tan lo pti té i nyabou shasé-dann tan-la, lo shate téi manz pa ronron. Demoun alor ? Sé solon ! Néna sak i avèye bien zot zanfan épi tazantan konm Fernand Rénaud téi di : « Néna bouro zanfan ». I fo dir nou, la ras imène, nou néna sak la natir l’amenn pou nou é sak la kiltir l’aport pou nou anplis é sa i vien pou diminyé lo natirèl é i pé sfèr nout kalité d’momon épi nout kalité d’papa lé pi sak li lété. Alé ! Mi kite azot rofléshi la dsi é ni artrouv pli d’van. Sipétadyé.