Kansa i fini avèk sa, Kansa i fini avèk pétrol-la ? Sa i sort dan la tèr, i fish an boi karant épi i sort par anlèr ousa domoun la fé bann pui ! Alors la pa in nafèr nana de tou-tan, limanité va niabou fini avèk ! Ala kozman inn anparmi mon bann dalon, sak la pa invant lo-sho i di amoin toultan.

Mi konpran in pé sak li di, kan i oi dann télé koman i tir pétrol par million é par million baril dann péi ousa nana so lor noir-la. I tir si tèlman, lé difisl kroir in zour nora pi asé pou gaspiyé, konm koméla i gaspiy. Poitan tout demoun i koné pou diminié va diminié : va kout plizanpli shèr épi la kantité k’i tir dan la tèr va diminié. In zour, si la pa rod son ranplasan nora pi asé pou limanité kontinié son dévlopman.

Sa i rapèl amoin in zistoir : Lavé in foi, in moun. Li lavé in poul. Poul-la téi ponn zèf an or ; inn par zour, pa plis. In zour, li la rouv lo vant son zanimo. Li téi kroi, li té sar trouv zéf an or an gaspiy... Olèrk sa, li la trouv in grap pti-zèf, pankor grossi, pankor fé la kok an or. Li mèm la tié son rishès an voulan nir rish d’in kou.

Sa i arsanm bien sak demoun la fé épi i fé ankor avèk pétrol.

Justin