Lë plan pou nout lotonomi dann lénèrji i kontinié son shëmin. La-ba Sin-pièr la Sitar la loué son bann toi pou mont in stasion léléktrisité. Près dé zéktar, konm bann zansien noré di : près ui san golèt karé*. Sa lé gran, i prétan mèm an Frans la poin konmsa. Sa i prouv gouvèrnman fransé, la lang lé long (rosoir vid i fé bonpé dézord !) mé solman la pa tro for pou fé. Sansa son tèt lé anklavé avèk son bann santral nikléèr.

Avèk in santral konmsa va gingn donn kouran sèt san famy. Nou pé dir, i fé pa bonpé, épi së vitès la, nou lé pa paré pou ranplas pétrol. I fo pa nou obli, sa i rant dann in plan. I fo kont avèk lë tan épi na poin rienk lénèrji solèr. Nana lë van, nana la mèr, nora la “géothermie”, nana la bagas... La list lé ankor long. Épi, fir-a-mézir nora progré : bann linvatèr i travay.

Alor siouplé, bann i port la boush kabri, fèrm in pé zot také. Sak i oi pa, mèt linèt. Épi, sak i suiv lë plan, fo tash moiyin an avoir in méyèr kominikasion ankor, pour kë nïl n’ignor.

*in léktar sé 425 golèt karé. In golèt karé sé 25 mètr karé par-la.

Justin