Moin la fine dir moin té pa pou in fète lo pèp rényoné lo 28 oktob 2018 é moin la fine é pass in mésaz dann Témoignages épi dsi fas-bouk. L’èrla, moin la gingn in répons in dalon rényoné é lo ga téi di konmsa :

« Justin moin lé dakor sanm ou su deu troi zafèr. 28 Oct sé la fèt international du kréol, pa uniquement de la langue. mé ou na rézon la lang lé o centre de la kréolité. é na in takon problèm y okip a nou réyoné, kom ou di, ilétrism, chomaz, kiltir… dépi konbien tan nou koné sa ? eske lé réglé se bann problèm ? mi croi pa. sak i mank isi sé lunité ant kréol. donc, y fo ni komans par angaz in diskision sérié ant sak y veu. ma na kom linprésion ou lé kont la sélébration du pèp réyoné ? libéré ou pa sé in manifestation ki veu kré linité isi la réynion. ansanm nou lé pli for. »

Pou kosa mi mark sak li la ékrir dann Témoignages ? Pars sak li la ékrir lé inportan ! Li la ékrir i fo in fète lo pèp rényoné é i doi z’ète la fète l’inité lo pèp rényoné. Mi di pa in fète pou ranfors l’inité rényonèz sé in mové l’idé. An kontrèr sé mèm in bon l’idé é kont pa dsi moin pou alé kont in l’idé konmsa. Astèr kan li ékri « ma na l’inprésyon ou(Justin)lé kont la sélébrasyon lo pèp rényoné » mi diré k’li rode lo pou avèk lo lant dann la tète la poin shové-antansyon mi di sa pou plézanté, solman pou plézanté.

Astèr mi krin kan i parl l’inité lo pèp rényoné i obliy nout pèp lé dann la lité kont lo sistème kolonyal (néo si zot i vé). Li lé angazé dann in lite zour po zour pou son libérasyon konm pèp avèk son lidantité nou l’apré rovandiké – i anpèsh nout kiltir pète an flèr !- épi sosyal pars i mank anou l’égalité, i mank anou lo progré lo dévlopman. Mi èmré pa désèrtin i promène lo né anlèr, la boush anfariné, épi i shant a tu-tète nou lé rényoné, nou lé rényoné, nou lé rényoné. Mi yèmré pa lo doudouism i arvien an fors.

Antansyon, mi di pa lo dalon la suiv mon fèss dann zournal lé dann la ligné doudouist. Mi pans mèm lo kontrèr mé, konm mi pran ali o sèryé li osi, i fo li konpran in pé sak mi di. Lé ga, nou lé dann in bataye idéolozik oui sansa non ? Si nou lé dann in bataye idéolozik ébin i fo ni soubate - ni pé pa fé konm si. Sé pou sa moin la di : a kansa in fète lo pèp rényoné libéré. Konm la shanson i di : sa la pa in parol anlèr ! Moin lé pour in fète lo pèp rényoné dann la lite an atandan son libérasyon,

Astèr pou lo 28 oktob : lé vré pou moin lo 28 oktob, sé lo zourné internasyonal bann lang kréol dopi in désizyon bann kréolèr la pran l’ané 1983 donk in dat istorik nou la poin la droi galvodé, in date internasyonal anplis i fé lo lien rant tout bann kréol lo mond antyé é ni pé pa anvoye sa dingé konmsa. Pou moin zour-la i doi rèss toultan avèk son mèm nom – in zour internasyonal sé pa arien kant mèm é mi pans pa nou néna lo droi isi la Rényon éfas sa dsi kalandriyé. Alé ! ni artrouv é si zot lé pa dakor i fo zot i done amoin lo grin. Si zot lé dakor, alor alon mète ansanm : nout volonté va soulèv bann montagn.