Lé ga, moin la parti loué in kaz anlèr. Normal vik moin sé in moun atèr : la fé pèy amoin kat foi lo pri in moi loiyé. Ala inn pou bann fré lazans, ala dé, ala troi pou la kosion, ala kat pou in moi loiyé. Konm di méssié lo prézidan la Frans, ala in bon manièr gonf mon pla, épi amélior mon pouvoir d’achat.

Poitan, lo pézidan la di va pèy soman in moi kosion. Li la di sa dann télé, é moin, moin la bien kart mon zorèy pou ékout ali. Li la di sa va komans lo promié zanvié. Oui, mé mi souvien pa lané ! Ala inn, mé konm la té fine astik mon posh, moin la kalkilé. Akoz sé moin ki pèy lo fré dazans ? Lazans i travay pou mon propriétèr, i ramas larzan pou li, pa pou moin. Moin, li plime amoin ! Alor, akoz mi doi pèy sa moin. Pou moin, sé lo propriétèr ki doi pèy ali, pou lo sèrvis li rann lo boug.

Pou la kosion, kossa li la fé avèk mon shèk ? Li la mète sa si son kont dé bank : kan sa va fé pti, dann la posh kissa sa i sar tonbé ? Pa dan la miène, mé dan la siène. Alor, si pandan dizan, larzan-la i travay, konbien sa i raport é konbien mi anpèrd ?
Méssié lo prézidan, wi oi, si wi vé, nana moiyin pou amélior mon pouvoir d’achat. N’artrouvé !

Justin