Koz èk moin sé koz èk in kouyon mé sé o pyé d’lo mir k’i oi lo mason. Mé zami, dann tout sak i fé, néna avan é néna travaye apré. Lav in linj-dakor !-mé i fo fé shésé, apré i fo ropasé, ranjé. Tyé in volaye, mé apré i fo fé kui ali. Parèye pou zoizo : lé posib kol ali mé sa i manz pa konmsa, i fo fé kui ali épi sèrv ali bann zinvité é lo rèss, na poin sète nin pou fé sa. Donk, kan ou i kroi travaye lé fini, li komans sinploman. La vi lé konmsa : kan ou i kroi ou la fine fé in travaye, ébin non, néna ankor bonpé zafèr pou fé. Mé antansyon : kosa k’i ariv si in moun i konplik sak i fo fèr, si li miltipliye lo bann tash, ébin sanm pou moin li done ali travaye initil. I di pa lé konpliké pou fé sinp é lé sinp fé konpliké. Alé ! Mi domann azot pou rofléshi la dsi é ni artrouv pli d’van. Sipétadyé.