Mézami néna dë poisson i rossanm bien : inn i apèl banklosh, l’ot sé pèshkaval. I rossanm bien, mé i vé pa dir inn sé l’ot é l’ot sé inn. Pars an vérité banklosh i ansèrv la plipar d’tan-i prétan – konm zapa tanka pèsh kaval li ansèrv dirèk pou fé kari donk inn sré pli bon ké l’ot.. Astèr si wi koné pa, in vandèr poisson in pé abïzèr lé riskab vand aou inn pou l’ot. – étone pa ou tro si arivé out kaz wi gingn in komantèr déplassé.

Mé la pa sa, l’èr-la nou lé dann in kozman ni rode kossa sa i vë dir. Pou mwin sa i vë dir, i fo pa rabèss lo moune konm kan i pran zanfan bondyé pou kanar sovaz, sansa po d’shanm pou pla kouvèr.
Alé ! mi kite azot rofléshi la dsi é ni artrouv pli d’van. Sipétadyé.

Justin