Mi sort lir dann in zournal la rényon, lo préfé la anil in konsèy minisipal tanto, lé rar sa. po kosa ? I parétré noré fé in lérèr kan la anvoy lo bann konvokasyon pou bann z’éli, nana in délé pou sa, la ariv tro tar. I prétan, nana ankor rokour parèy dann tan. Ryink bann rokour i pé sanpasé, si z’afèr la kouyonis é i fé pèrd lo tan touzour. Zot i koné nana ryink gratèr d’ki i fé pa l’érèr mi an konvyin. Mé la dopi yèr, mi poz a mwyi bonpé késtyon. Dann la méri la ariv so mérdié, lo mèr la fé vni so gran kador dé frans. Bann moun i bat la lang i di, fanm la la gingn tout, lo vwayaz péié, déménazman, la kaz osi sir plass, èk tout lo bataklan é la finn d’mwa san traka, va d’swa. Défréyé d’tout mi di a ou.lé pa doné voui ! Lo mèr la di « li pran ak, in pwin sé tout » é pétèt si té in kréol la kour noré di « fot profésyonèl ni fou déor in pwin sé tou »

Rapèl a zot la fé in gran tapaz èk sa, la di anou, na pwin sak i fo isi, i mank la konpétans konm souvan ni antan, i fo alé rod laba déor, i fo in gran lékléraz. La gouyav do frans ti kok, mé la pou lo kou la gouyav do frans la gingn in kou d’grèl, la gaté. Tou dinkou mwyin la mazinn mon bann dalon « Nou lé kapab » Zot na rézon baya ! Kan mwin té i travay ankor, èk mon bann kamarad syndikat nou té i sobat osi pou fé donn travay rényoné mé la ankor zot té i profèr gouyav do frans, lo bann désidèr té réponn a nou « zot na pwin la konpétans nésésèr isi » lo gran mo, é konm i di dan la ot, i fo fé in apèl a kandidatir nasyonal, pou la gèl té pé kont si zot, mondié sénièr monn ti pé san té i bouy.

Mwin té i pran sa konm in insil, té mank a nou réspè vi tou sa diplomé nou nana , bak plis 5,6,7… 10 mèm an poundiak. Par l’fèt, i pé arivé i mank a nou in léspésialis, in diplonm rar, na pwin ditou isi, pa in mang a tèr, ni pé alé rod la ba mé tasyon, fé pa an kashièt dérièr nout do. Franshman, i s’pouré, nou lé blizé, blizé pou vréman pran in gouyav dé frans baya, mé pou l’kou, pran pa sak la finn gaté souplé.