Médame, méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson. Mézami, kozman-la sa in kozman kanak é san fé éspré mi trouv sa i tonb bien, in zour gouvèrnman La franss la désside trafik in référandome dann ka kanaki.

Gouvèrnman La franss i vé pa dékoloniz dann son bande lansien koloni é nou la fine gingn lokazyon di sa souvan–défoi. Mé alon lèss bande politik réaji konm zot i panss i fo fère. Pou noute par alon sèye konprande kozman nou la déside anparl zordi.

Dann déssètènn sivilizassion i di konm kékshoze de bien k’in moune néna in zizman sévère – donk san passyans – par rapor toulmoune pars li lé sévère, donk san passyans par rapor li mèm… Oila in provèrb lé plu kool. Mi panss sinploman li vé dire la vitèss néna son tan é sa sé in n’afèr i fo aplike lé zote, épi wi doi aplike aou mèm konm méyèr fasson pou rézoude in problème.

Alé ! Mi kite azot rofléshi la dsi é ni rotrouv pli d’van. Sipétadyé.