Konm i di souvan-dé-foi dann désèrtin blag : « i fo pa konfonn ». Pars inn é l’ot i ansèrv pa mèm shoz ! La pa bézoin fé in désin pou konprann in n’afèr konmsa. Solman mon késtyon sé pou savoir si sé in kozman an l’èr osinonsa si sé in provèrb. Si sé in kozan anlèr, ni sava pa pli loin mé si sé in provèrb i fo ni rod kosa sa i vé dir dann la vi é dann kèl ka ni pé tiliz in kozman konmsa. Dann inn, i pé an avoir in bon kari é dann l’ot la pa ditou lo mèm z’afèr ! Inn i sava dann la kizine, l’ot i sava dann kabiné ! Shakinn na son itilité é tronpé sé pa konète viv dann l’onèkté ! Kosa zot i anpans ? Moin pèrsonèl mi trouv lé in pé tiré par lo shové.