Na in vyé shanson dann tan lontan téi di : la poin bébète konm z’abitan, i pran po d’shanm pou pla kouvèr, i pran makaroni pou la bouzi. Si mi tronp, sa in shanson karnaval. Zot i koné dann karnaval téi gaskone inn-a-l’ot. Té i gaskone yab, pip lé o, malbar, kaf, konpèr shinoi, demou étranj. Kisoi sinploman pou fé ri la boush demoun, kisoi pars l’avé in vanzans pou tiré dsi in moun té sansé rokonète ali. Dizon, konm Mao téi di, sa té bann kontradiksyon dann lo pèp. Té rar sa téi dézénèr, mé kant mèm na défoi té i pète bataye sirtou kan la rak téi mèl. Nout gran shantèr Madoré téi di pa : « Kan la raklé dann boutèy, li bouz pa vréman, mé kan li la rant anndan, sa lé pi parèy ! ». Mi arète tèr-la é ni artrouv pli d’van sipétadyé.