Mé mi di amwin pou kossa mi parlré pa in langaz kri si lo kozman lé né kri konmsa invanté par mon bann nassyon… Antouléka mi tienbo d’dir azot prann prékossion sa la pa in défo, sré mèm inn kalkité sou kondission ké ou lé pa tro manyak. La propté mi panss sé galman in kalité mé dann tout zafèr lo tro lé nuizib.

Bann franssé i di pa : « lo myé sé l’ènmi d’lo bien « .. In kozman mi di souvan défoi mé souvan défoi mi fé zète amwin par sa. Si mi krétik lo tro prop, i réponn amwin sé pars mwin lé makote. Kan mi di i fo ète pridan mé pa tro kant mèm, i réponn amwin mi koné pa lo danzé é lé riskab kout amwin shèr

Astèr mi kite azot bien rofléshir la dsi, é ni retrouv pli dvan sipétadyé.

Justin