Mon kouzin, moin la bien lir sak ou la ékri. Mi arprosh pa ou out kozman distingé. La pa in késtyonn boush sal mé mi trouv lé aproshan. Mé sak mi arprosh aou é mi primann aou la dsi, sé dsi la késtyonn prinsip prékosyon. Pou kosa ? Pars, sanm pou moin, sa in prinsip lé sèryé pou d’bon. Si i méfyé pa kékshoz nouvo, i ariv toudinkou, é la pankor fé l’éspèryans, m’a dir aou sa i rouv shomin pou l’éspri tordi lo moun i baz solman dsi l’arzan. Sé konmsa ké la donn bann zanimo i manz zèrb la poud la vyann pou manzé : ou i souvien la maladi la vash fol. Sé konmsa ké la tiliz dsi d’moun médikaman détourné : mi rapèl aou lo médyator. Sé konmsa ké kan ou i rogard l’étikète désèrtin trik pou manzé, touzis si ou i gingn pa l’étourdisman. Donk mon kouzin, port in pé atansyon sak ou i ékri, pars afors fé l’amizèr piblik v’ariv in zour i apèl domin-antansyon pangar ! Ni artrouv in zour pétète !

Nb-In bon dalon la ékri amoin dé-mo pou dir, i égzis galman in kozman k’i di : « Prékosyon i suiye son boush avan manzé ». Sa lé dos sa !