Premyé Mé 1886 : dann Chicago, bann zouvriyé i manifèst sï la plas Haymarket. Lë manifèstasion i shof, la polis i karsèr uit pèrsone. I akïz azot an aoir lans in bonm : i kondane sink a-mor : i tyé kat an amaran in kord dann kolé, Lë sinkyem i suisid. Prëmyé Mé 1890, nana tran’sink mor an parmi bann zouvriyé. Ala pou listoir : mi arèt tèr-la sak i vë konèt plis, i fodra alé rodé.

Pou mon par, mi vé dir prëmyé mé, sa in drol de fèt ! Dabor inn, la fèt pou kisa ? La fèt pou tout moun, issi mèm, épi dann péi déor la pou ral zot gongon la mizèr : bann moun la poin boulo, bann moun nana in pti guiguine retrèt, bann moun i gingn bonm sï zot tèt akoz dann zot péi na la guèr. Sa la pa la fèt sa !

La fèt, konm toujour sé pou bann moun na sak i fo an gaspiy. Lé ga, prëmyé mé, in jour d’fèt sa ? La fèt lé kourt pou bann ti-kolon !
Spandan, si out madam, out mari, out zézèr sansa out zanfan i gingn kado aou in pti bransh mïgué, mi pans sar la fèt dann out kèr. Jis in pé la joi dann kèr !

Justin