Na in moun i apèl Didier Robert. I prétan dir, sa lo shèf la Droite, issi La Rényon. I di ossi, sé li k’i prétan pran la plas prézidan Konsèy réjyonal pars zéléksyon i tarde pa arivé… é konm in sèrtin vin Silaos dann tan, i prétan sa i rann demoun fou. Sétaki i san son kor, i baté déssi léstoma, i tyé douz, i blèss katorz… mé kan sar fini, v’arète in vinkèr, lé z’ote va rèss atèr.
Konm lo shèf la Droite na poin program, li sèy piosh in pé issi, in pé la-ba, li promète sosi, li promète sola… li sava trouv lo moiyin dépans plis avèk moins larzan. La pa lo promyé, la pa lo dèrnyé va di sa, mé tardra-vyindra, li va fini par kass son né dovan la réalité. Arzoute èk sa toute kalité la mansonjri li mank pa pou dir, li rate pa in lokazyon dir. Dèrnyé z’afèr, sé Paul Vergès lé résponsab si i sava fé in nouvo lizine éléktrik va ansèrv lénèrzi lé pa ronouvlab dann la komine La Possession. Arète in kou Baya ! Lo prézidan, son do lé larj, mé li la pa lo préfé, li la pa non pli l’édéèf, li la pa l’Éta, é si banna i désid fé in n’afèr konmsa — in bétiz asiréman ! —, la pa prézidan la Réjyon l’otèr. La pa li l’otèr si banna i donn in kou d’kanif trann-dé dann nout plan l’otonomi énèrzétik.
Pars nout plan sé sa, pou protèz l’anvironman, pou arète gaspiy larzan dann pétrol — plis sink san milyon l’ero — épi dann sharbon, é pou mète nout péi dann shomin lo dévlopman dirab... In konséyé la Droite, banna la bordé, a s’ki paré i apèl Roland Hoarau, la fine prévnir lo Didier Robert, la fine dir ali kontinyé konmsa… konmsa mèm, li l’apré prépar ali pou mète son kostime la défète.

 Justin