Kissoi bande sitoiyin – zadministré kan ou lé mèr in komine ; kissoi l’anvi alé pli vite ké la mizik pou modèrnize oute lantropriz ; kissoi oute prop lorgèye i pouss aou dépanssé alé oir lé pli préférab fé zékonomi. Sa i rapèl anou la fab « La sigale é la fourmi ».

La route litoral i done anou in bon légzanp in prézidan fourmi, épi in prézidan sigale. Donk l’avé in foi in prézidan fourmi. Gouvèrnman la di ali i fo li dirize par li même la route litoral pars gouvèrnman l’avé désside té konmsa é pa otroman. Prézidan fourmi la di li lé dakor solman i fo ranj lo route litoral é anplisk sa li la di La Rényon la bézoin in train é si gouvèrnman lé dakor. La Rényon va gingn dë pou inn : in train, avèk in route pou lo pri la route. Sito di, sito fé, la sign lakor Matignon.

Mé oila par malèr lo prézidan fourmi la pèrde zélékssyon é in prézidan sigale la ranplass ali. Sito di sito fé, li la di li profère in zoli lotoroute plito k’in route épi in train. Li la rosign zakor Matignon épi li la domande bande gran lantropriz, san rogarde la dépanss, mate in plan in route supèr-zoli, super-prézantab é li téi oi ali déza konm lo roi dan lo péi. Malorèzman prézidan sigale la gingn lanspèk par dsi lanspèke é son lantouraz téi manke pa flafte ali : san mantir si oute ramaz i rossanm oute plimaz ou sé lo zéni dsi la tère.

Dann son kèr li téi di : « kissa i tape amwin, kissa i nyabou bare mon karma, kissa i nyabou anpèsh amwin fé mon sipèr-route. ». Li la trouv demoune pou bare son shomin é kan li la pèrde zéléksyon li la lèss in paké problème avèk trépé - sansa pa ditou – solissyon. Si tèlman li la démissyone toute son bande manda an panssan pétète arvnir in zour, lo tan sa i éfass dann léspri demoune.

Konte touzour ! Fyé pa tro ! Sha shodé la père lo fré.