Momandoné sépa ki la pran la déssizion, mé la fé dékol l ’avion. L’avion la dékolé mé kan li l’ariv pou pozé lété kékshoz mi promète azot : Droite-a-gosh, droite-a-gosh li la kanté dsi la pist-la é mi pé dir azot lo bann passazé la gingn in tranblade karabiné.

Dann la nuite lotèl téi bouz konm in fèye é kan mwin l’apèl la réssépssion la réponde amwin siklone téi pass dsi Moris é bann sèrvis morissien la trouv drol k’in l’avion i dékol dann in sityassion konmsa pou ariv In landroi la rouv térin an katastrof pou pa fé rotourn lo laviyon La Rényon.

Pou kossa mi rakonte azot sa ? Pars dopi in somenn néna in déssin dsi lo parkour Belal i sirkile dsi internet : issi néna inn é Moris néna inn. Pou La Rényon siklone va pass koté Sin-Dni pou Moris Siklone va pass koté lo Por-Sin Pol. Antansision sé lo mèm Belal, sé lo mèm siklone mé néna in shéma lé sirman fo, amoinss ké lé dê lé pa zist… é nou ladan ? Fé konm ni gingn é kontante anou sak ni konpran. Si nou lé pa kontan, nou na ka pran konstan.

Mézami si mi di sa, la pa pou fé in kritike initil, sinploman pou toulmoune mète dakor pou konprann la vérité é sirtou pou pa tourn anou an bourik…

Lo pli gayar sé l’alèrte violé. Na poin in méyèr trouvaye ké sa ? Si lé rouz lapoliss, zandarmri ponpyé néna lo droi sorti pou anpèsh anou dékoné. Si lé vyolé la poliss, la zandarmri é la sékirité i rèss kalfétré é bann marmaye La Rényon — kan lo sha la pa la, la souri i danss ! — é oila ké déssèrtin la profite in maks san risk é péril.

Alor lo préfé la rolanss l’alèrte rouz — donk lo méssaz lé klèr pou bann ravajèr La Rényon. Bouj azot astèr !

A bon antandèr salu !

Justin