Défoi laba dan La franss sansa l’érop kan néna bann gran manifèstassion dann léspor sansa dann d’ote éspéktak lé pa rar demoune i fé in zèss rassis konm pou gaskone in sportif koulèr fonssé in pé i émite lo kriyé bann sinz, sansa i di éksopré in kozman rassis. Lé vré koméla sé dé shoz bann zofissyèl i konbate avèk fors mèm ziska arète in gran match tazantan, mèm défann bann rassis rante dann tribine.

Dsi Rényon promyèr avan-yèr soir l’avé in sobatkoz dsi la loi Taubira-in sobatkoz bien intéréssan — mé wala k’in listorien — zéograf, i di kékshoz li la lir dann zoinal le monde néna in boute tan. Christiane Taubira i ariv dann in vil an franss é in jenn fiye l’apré plish in banane é wala kossa èl i di : « Pou kissa la zoli banane ? Pou la guenon » é èl i prézante lo frui la miniss dann tan. Antouléka lo zèss rassiss lété bien la mé i paré demoune la pa tro réazi kont in zèss konmsa.*

Aprésa bann sobatkozèr-kozèz la fé bonpé komantèr é an parmi inn pou dir dann l’erop demoune néna ankor in problèm avèk la koulèr sansa la rass demoune… Plizyèr pèrsone la di la mèm shoz. Mé la di issi la Rényon nou la fine règ nout problèm avèk la koulèr d’moune… Mwin pèrsonèlman mi viv dopi lontan é si mi kondstate nou rényoné nou la fine fé progré dann la lite kont lo rassism, mi panss pa nou la fine sold nout problèm san pour san. Mi panss néna a fèr ankor. Biensir sak i fé ankor laba dann l’érop mi kroi pa ni fré ankor issi mé sa i anpèsh pa nou kontinyé léfor.

A bon antandèr salu !

*mi di azot konm mwin la antann.

Justin