Zot i koné, shak ané néna in zour éspésyal, banna i batiz : la fète bann voizin. Moin lé pa kont in fète konmsa, moin sré mèm plito pour. Pou kosa ? Pars rant bann voizin néna bonpé la solidarité épi l’antr’ède. Mé tazantan néna problèm é l’èrla la i fo trouv in bon solisyon. Sansa, mi asir azot, sa i pé gate la vi lé z’inn épi lé z’ot. A bien romarké si néna in dinamik l’antant shé bann voizin, lé shoz i spass myé ké si i sava rode demoun lé oin, demoun lé étranj-pir ksa in l’otorité - pou ramenn l’ord rant bann voizin.

Astèr si ni sava pli loin k’sa. Par ébzanp, si ni rogard in pé sak i pé spassé, dann in voizinaz zéografik. Konm la Rényon, l’il Maurice, Madégaskar, Sésèl, Komor, Chagos épi lo rès ni pé apèl sa nout indyanoséanité. Dabor, bann pli danzéré foutèr d’ dézord i sort loin : kisoi lo kolonyalis épi lo néo fransé, l’inpéryalis amérikin épi britanik. Moin la fine anparl tout lo bien mi pans par rapor banna.

Astèr si ni anparl bann péi nout l’androi l’oséan indien : ni pé dir nou néna in l’intéré antann nout tout ansanm é konm ni viv dann in mèm l’androi dann la proksimité, mi pans nou lé fé pou viv dann la bone antant inn koté l’ot, dann l’intéré inn a l’ot. Nou lé fé pou bien antann san lèss lé z’ot diviz anou. Tousa, si nout zyé la pa boushé. Tousa si ni mète konm santr nout vi in bone antant rantre nou, dann l’intéré nout bann pèp l’indyanoséanité.

Mé zot va dir amoin néna la COI ! Oui néna la COI mé lo rézilta sak li la i pé pa bote anou, konm i pé pa bote lé z’ot pèp louès loséan indien. In rézilta sé d’mète La Rényon dann fon kanal épi ranplas anou par La frans l’oséan indien. Kèl tristès mé zami ! In no’t rézilta : sèrv marsh pyé in puisans kolonyal san romète an késtyon son bann vyolasyon lo droi intèrnasyoanal. Kèl tristèss si é arienk pou in pla lantiy ! In n’ot ankor : lès fèr i krime kont l’imanité par raport bannzil Chagos

Ala pou kosa, ni doi mète an marsh la diplomasi bann pèp avèk konm poinn vizé promyé : problèm rant voizin i règ rant voizin ! In bon komansman pou mète an marsh l nout l’indyanoséanité..