Nout kanar lé noir : mayi, lo pri la goumanté, luil la anshéri, de ri mèm to, do blé parèy... Alors, dann in bon pé péi, demoun sak lé pov i gingn lo shok é pliské sa vik pou zot sé in vré katastrof. Konbien demoun an plis i sava mor avèk la faim ? Kan sar fini - si i fini in zour ? - va konté... Bann rish la poin pou trakassé, akoz lo pri kaviar, an rézon, la pa goumant si tan tèlman.
Méksik la-ba, demoun la révolté akoz soso mayi lé tro shè ; dann l’Italie démoun i di zot v’arète manz makaroni ; dann l’Afrik na kék péi la révolté galman ; bann Haïti i viv in vré lanfèr déssi la tèr... Nout tour di mond la mizèr la pankor fini.

Issi La Rénion, lo pri manzé la goumanté épi la pankor fini. Alors, mi antan i di : « I fo lobsèrvatoir dé pri i zoué son rol ! ». Sa i fo, lé vré, mé sa i rézoud arpa lo problèm la faim déssi la tè. Si ni rogard in pti pé pli loin ké lé bout nout né, nou va konprann lo problèm : plis demoun déssi la tèr, moins manzé... an plis ké sa, manzé i sanz an karbiran pou loto !
Konm souvan dé foi, problèm lé sinp mé solission lé konpliké.

Justin