Akoz kan i di va fé in n’afèr i bate tanbour for konmsa ? Akoz kan i désid arété i fé pa bonpé dézord ? L’afèr i fini an lo d’boudin-pèrsone i anparl pi é sak i anparl touzis si i di pa zot l’apré sèye fé lèv lo mor. Poitan mi pns néna défoi lété pa initil fé in gran tapaz dsi la késtyon.
In gran tapaz pou la MCUR ! Zot i pans pa nora té bon fé ? In gran tapaz pou tram-train ! Zot i pans sa narté initil sa ? In gran tapaz pou léstrésité a partir lo d’mèr, a partir lénèrzi volkan, an parlé ranplas sharbon par la biomass ! Sa norété vbien itil. Sirtou kan apré in bon koup de tan, ala ké sak la koup l’artèr lo projé néna lidé zényal arfé sak zot mèm la défé.

I diré ni port an nou-mèm konm in malédiksyon : sak nou la vouli in zour é soidizan lété pa bon, ala sa mèm in bon koup e tan apré ni vé. Pars ni viv dann in péi ousa bann projé i avort an kantité. Kisoi pars in pé i gingn paf é lo triyaz rant sak lé bon é sak lé pa bon, sak lé itil é sak lé initil-d’apré moin mi diré zot néna sak i apèl in konfizyon mantal.
Zot i koné kosa moin té apré kalkil néna dé troi zour. Moin té apré mazine la klimatizasyon bann batiman piblik avèk lo d’mèr. La Cinor té i vé fé sa. I paré na poin arien lé fasil pou fé konmsa. I paré sa sé in kékshoz k’i kout pa arien... Dann mon kèr, moin téi pans nartépli valab klimatiz bann lékol, bann krèsh, bann mézon troi zyèm az plito ké bann biro. Mé oila, d’apré sak moin la antann in pé la préfèr fé sa dann bann zantiy plito ké fé isi La Rényon.

Si sa lé vré mi pans sinploman lo bann résponsab la fé in sakré tour d’pass pass é d’apré sak i di si ni vé konète pou kosa, i fo ni suiv bann bakshich a la tras… Projé i mank anou ? Pa ditou ! Nou néna mèm bokou mé la pa tout i ariv a fé pou vréman. Lo famé malédiksyon moin téi anpal an-o la.