Yèr matin, moin la antann dann in radyo in moun apré di : « Hollande i gingn ar pa réspèk son promès ! ». Pétète oui ! Pétète non ! Mé dsi kosa èl i baz ? Sé sa ké la fé rèst amoin bète. El i di konmsa, èl la lir sa dann in zournal la France, pa dann in zournal La Rényon... donk lé vré pou vréman. A bon ! Pars zot i kroi zournal déor lé pa mantèr konm zournal isi ? Pars zournal déor i tronp pa dan sak zot i anons ? Konm di lo kont, ni artrouv lo sindrome gouyave de France, pli méyèr, pli zoli, pli bèl la poin.

Sa sé pou plézanté, mé sak lé sir la sityasion l’ékonomi, dan la France épi dan l’Erop, la pa roz vréman. La Kour bann kont i sava sort in rapor dsi la sityasion l’ékonomi fransèz, é a s’ki paré, i anons déza i fo pa rogoumant z’inpo, i fo diminyé bann dépans… ; donk arfé konm Sarkozy té i fé, san Sarkozy. Bin si sé sa lo shanjman, nou lé mal parti. mé konm i di : i fo pa fé la bou avan la plui. Lo Prézidan avèk son bann l’ékip la di, zot l’avé fine prévoir in n’afèr konmsa. Sarkozy avèk la droite la lès lo péi an dégréné, sa toulmoun i koné.

La pa pou sa k’i fo fé la mèm shoz ké li. Demoun i atann inn-dé désizyon k’i dévir lo do avèk la politik Sarkozy. Prézidan la di li, va rolans l’ékonomi, li va répar lo bann z’inzistis. Li va goumant z’inpo bann rish... mi sar pa di tout sak nana dan lo soisant mézir épi dann lo trant pou bann péi l’Outre-mèr ; i fo pa non pli li obli sak li la di dann diskour Sin-Lui. Pou nout par, ni mazine fé tout tout-suit, sa in n’afèr lé pa posib. Solman ni atann in bon programasyon. Konmsa, ni oi klèr dan la politik gouvèrnman. Dan tousala, i fo ète réalist : la pa bézoin oir la sityasion pli noir k’èl i lé, sansa pli roz k’èl i lé. Mé promès, sé dète !

 Justin