Ala in bon kozman ! Lé vré si ou néna in bon moralité sé konmsa ou i fé. Antouléka ou i fé out méyèr posib pou tienbo parol. An prinsip si ou i kroi bann provèrb ou i pé mazine si ou i pèye out dète ou néna dé shans anrishi aou-grosi out pla konm i di. Mé lé posib bonpé d’moun i pans pa konmsa. Zot néna in sèl pansé dann z’ot tète, sé fout aou d’dan é sirtou pa pèye z’ot dète. Mi souvien dann tan lontan, mon gran-pèr l’avé in kamarad la domann ali larzan pou anprété é aprésa la dispari – i prétan téi fé in gran karé pou pa ropass dovan son port. Mé, konm di lo kont, dë montagn i rankont pa mé dë moun si. Donk in zour mon granpèr la fini par bute avèk li fas-a-fas éi la di ali konmsa : « Ou na poinn parol ou ! ». Lo boug la gingn la ont vèye pa. Alé ! mi kite azot rofléshi la dsi é ni artrouv pli d’van. Sipétadyé !