Zot i koné Guantanamo ? Sa in kan militèr, lé la-ba dann Kiba. Mé antansion la pa in baz militèr bann Kibin, mé in baz militèr bann Zamérikin. Bien sir, bann Zamérikin lé pa présé rann baz-la bann Kibin pars gouvèrnman Kiba avèk gouvèrnman amérikin, sa i shass pa ansanm. Pir ksa, sa dé fran zènmi dopi 1959, dann tan Fidèl Castro la fé son révolisyon... Rozman l’Amérik sé lo péi lo droi de l’om !

I di, mé lé pa si sir ksa. Pou koué ? Pars, zot i koné kan ou i fé la guèr é kan i trap aou, ou na dé droi é si i ziz aou, i réspèk out droi. Sa in n’afèr té i doi ète vré pou tout bann prizonyé la guèr bann Zamérikin. Té i doi ète vré, mé lé pa vré ditou pou in bonpé rant zot. In légzanp : bann prizonyé dann Guantanamo. In bonpé lé la-ba dopi l’ané 2001. Zot i pas pa an prosé, zot lé pa kondané, mé zot lé la, dann la prizon san k’i lès azot sorti. Pou koué ? Pars i di zot sé in bann téroris, donk zot na poin mèm droi k’bann prizonyé la guèr, vi k’zot osi zot i réspèk pa bann droi la guèr. Donk sa i donn lo droi bann Zamérikin pou fé parèy !

Tazantan, zot i vanj in pé : zot i aksèp pa zot sityasion. Dèrnyé tan, zot i fé la grèv la fin : in santène dsi san soisant sis. Pou kosa ? Pars bann jolyé amérkin i fouy azot épi i manyé san réspé zot Koran. La pa promyé foi sa i ariv, mé bann Zamérikin i vé pa konprann sa zot liv sin é i manyé pa sa an sharète shaviré... Mé si zot i rapèl bien, prézidan Obama l’avé di li té i doi fini èk la prizon Guantanamo dann son promyé manda. Son promyé manda la fini mé lo prizon él touzour la. Dézyèm manda la fine komansé, mé son promès i réaliz pa. Romark, konm in pé i di, in promès i vo arienk pou sak i kroi pa pou sak i fé. Malérèzman lé ankor vré so foi isi. Promès sé dète ? Mé pa touzour.

NB : Pou sak konm moin téi kroi avèk Obama noré éstop bann krime son polis sokrète, sé in rogré. Mé i fo kroir kisoi Obama, kisoi Bush, kisoi in noir, kisoi in blan lé shoz lé parèy. Bann prizonyé la guèr lé parké dann Chagos, dann bann prizon ségrète loué dann la Pologn, dann l’Ikrène épi d’ot zandroi ankor. Lo kor Ben Laden té balansé dan la mèr o an ba in lélikoptèr. Dann katrovin dis nèvan (i paré !) va konète koman sa la spasé ; na ankor d’lo pou koul sou l’pon lipokrizi amérikène.

Justin