Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, vi voi bien la kanpagn lé kaziman rouvèr é sétaki i déklar kosa zot i sava fèr si bann z’éléktèr i tonm dakor an votan pou zot. Sa lé prévi konmsa é sa lé toultan konmsa. Mé nana sak i promète fèr kék shoz é vi pé kroir azot pars zot i koné dé koik zot i anparl : sé lo ka d’mésyé Didier, mé lé z’ot. Moin pèrsonèl mi fé pa zot konfyans pars z’ot lang i bate, i bate dann vid. Mi anshèv dir i bate initil é sé pou sa mi pé pa kroir azot. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, pou inn foi ankor moin lé pa dakor avèk ou é pou in sinp rézon. Nana i gran rout an mèr in pé i vé fé. Lo pri a l’éstime sé in milyar sisan milyon – mé si i dépans plis sé La Rényon k’i doi péyé. Si sé dé milyar, i fo trouv ankor kat san milyon. Si i kout dé milyar sink, na nèf san milyon sé nou k’i doi trouvé. Si i kout troi milyar, vi voi in pé lo déga. Donk lo sirplis a péyé sa lé riskab andikap anou é lo bann promès, konm i di, i mor sou pyé tamarin… Moin kan Lebreton i di pa plis lo pri d’dépar, sa sé in n’afèr moin lé dakor ansanm pou la késtyonn pri. Lé z’ot i koz initil. Tok ! Pran sa pou ou !…

NB La nou la anparl l’arzan mé na d’ot késtyon é sa lé bien konpliké. Inn-dé l’égzanp ? L’anvironeman koman li sar trété ? Lo rolèvman nivo d’la mèr, kosa i fé avèk ? La kalité d’vi lo moun, i anparl pa don ? La santé d’moun i kont pou la po patat ? Mi arète la, mé nou na ankor pou kozé. Lo fime la pankor fini !