Gran-matin, mi sort rogard zournal parlé déssi in télé La Frans. Na in bonpé z’afèr pou di, mé sinpleman, moin la rotonir in shif. Na plis uit milyon demoun pov dan La Frans é shif-la i arète pa goumanté dépi lo pti prézidan lé o-pouvoir. Prézidan lo pouvoir d’asha ? Prézidan la lite kont la povreté ? La krak, la mantri... Solman dis pour san bann Fransé sak lé pli rish, zot rishès la grinp ankor in pé plis. Sète-la, la pa inn krak, la pa inn mantri ! La kriz, oui ! Mé pa pou toulman an-touléka.

Pou kossa ? Pars lo vré kontra lo prézidan la signé, la pa sète son kanpagn éléktoral. Son vré kontra li la sign sa dann in boite i apèl Lo Fouquet’s kan li la rosoir tout bann milyardèr, toute bann fès-an-or... l’èr in kantité d’moun té apré atann ali pou kriy Viv ali ! L’èr-la, té apré mark noir dési blan, tout sak i sava fé pou bann rish dann lo bo péi. Déssi so bann poin-la, Sarkozy la di la vérité : bann rish ankor pli rish, épi lo réstan k’i rèss pou bann pov, si nana ankor in réstan.

Issi parèy. Kisa la di « promès sé dète ? » Ankor in farsér. Mé kisa la di « promès i angaz arienk sak i kroi » ? In moun na bien rézon dann in sosyété i réspèk pa la parol doné, dann in péi lo gouvèrnman la droite i done lébzanp. Diskour lo sis novanm 2009 ? Gayar parol, parol in moun i oi bien klèr ! Dévlopman andojène, travay pou bann konpétans l’Outre-mèr, dévlopman dirab, tram-train, otonomi dann lénèrji é lo rès sak ni domann dépi lontan... pou toutsuit apré dévir lo do.

Promès sé dète ? non ! Promès sé l’opiome di pèp, in sort rès trankil !

Justin